Omnibus in causis sapiens doctrina salutem
Consequitur, nec habet quis nisi doctus opem.
Naturam superat doctrina, viro quod et ortus
Ingenii docilis non dedit, ipsa dabit.
Non ita discretus hominum per climata regnat,
Quin magis ut sapiat, indiget ipse schole.
I Genius the prest of love,
Mi Sone, as thou hast preid above
That I the Scole schal declare
Of Aristotle and ek the fare
Of Alisandre, hou he was tauht,
I am somdel therof destrauht;
For it is noght to the matiere
Of love, why we sitten hiere
To schryve, so as Venus bad.
Bot natheles, for it is glad, 10
So as thou seist, for thin aprise
To hiere of suche thinges wise,
Wherof thou myht the time lisse,
So as I can, I schal the wisse:
For wisdom is at every throwe
Above alle other thing to knowe
In loves cause and elleswhere.
Forthi, my Sone, unto thin Ere,
Though it be noght in the registre
Of Venus, yit of that Calistre 20
And Aristotle whylom write
To Alisandre, thou schalt wite.
Bot for the lores ben diverse,
I thenke ferst to the reherce
The nature of Philosophie,
Which Aristotle of his clergie,
Wys and expert in the sciences,
Declareth thilke intelligences,
As of thre pointz in principal.
Wherof the ferste in special 30
Is Theorique, which is grounded
On him which al the world hath founded,
Which comprehendeth al the lore.
And forto loken overmore,
Next of sciences the seconde
Is Rethorique, whos faconde
Above alle othre is eloquent:
To telle a tale in juggement
So wel can noman speke as he.
The laste science of the thre 40
It is Practique, whos office
The vertu tryeth fro the vice,
And techeth upon goode thewes
To fle the compaignie of schrewes,
Which stant in disposicion
Of mannes free eleccion.
Practique enformeth ek the reule,
Hou that a worthi king schal reule
His Realme bothe in werre and pes.
Lo, thus danz Aristotiles 50
These thre sciences hath divided
And the nature also decided,
Wherof that ech of hem schal serve.
The ferste, which is the conserve
And kepere of the remnant,
As that which is most sufficant
And chief of the Philosophie,
If I therof schal specefie
So as the Philosophre tolde,
Nou herkne, and kep that thou it holde. 60
Of Theorique principal
The Philosophre in special
The propretees hath determined,
As thilke which is enlumined
Of wisdom and of hih prudence
Above alle othre in his science:
And stant departed upon thre,
The ferste of which in his degre
Is cleped in Philosophie
The science of Theologie, 70
That other named is Phisique,
The thridde is seid Mathematique.
Theologie is that science
Which unto man yifth evidence
Of thing which is noght bodely,
Wherof men knowe redely
The hihe almyhti Trinite,
Which is o god in unite
Withouten ende and beginnynge
And creatour of alle thinge, 80
Of hevene, of erthe and ek of helle.
Wherof, as olde bokes telle,
The Philosophre in his resoun
Wrot upon this conclusioun,
And of his wrytinge in a clause
He clepeth god the ferste cause,
Which of himself is thilke good,
Withoute whom nothing is good,
Of which that every creature
Hath his beinge and his nature. 90
After the beinge of the thinges
Ther ben thre formes of beinges:
Thing which began and ende schal,
That thing is cleped temporal;
Ther is also be other weie
Thing which began and schal noght deie.
As Soules, that ben spiritiel,
Here beinge is perpetuel:
Bot ther is on above the Sonne,
Whos time nevere was begonne, 100
And endeles schal evere be;
That is the god, whos mageste
Alle othre thinges schal governe,
And his beinge is sempiterne.
The god, to whom that al honour
Belongeth, he is creatour,
And othre ben hise creatures:
The god commandeth the natures
That thei to him obeien alle;
Withouten him, what so befalle, 110
Her myht is non, and he mai al:
The god was evere and evere schal,
And thei begonne of his assent;
The times alle be present
To god, to hem and alle unknowe,
Bot what him liketh that thei knowe:
Thus bothe an angel and a man,
The whiche of al that god began
Be chief, obeien goddes myht,
And he stant endeles upriht. 120
To this science ben prive
The clerkes of divinite,
The whiche unto the poeple prechen
The feith of holi cherche and techen,
Which in som cas upon believe
Stant more than thei conne prieve
Be weie of Argument sensible:
Bot natheles it is credible,
And doth a man gret meede have,
To him that thenkth himself to save. 130
Theologie in such a wise
Of hih science and hih aprise
Above alle othre stant unlike,
And is the ferste of Theorique.
Phisique is after the secounde,
Thurgh which the Philosophre hath founde
To techen sondri knowlechinges
Upon the bodiliche thinges.
Of man, of beste, of herbe, of ston,
Of fissch, of foughl, of everychon 140
That ben of bodely substance,
The nature and the circumstance
Thurgh this science it is ful soght,
Which vaileth and which vaileth noght.
The thridde point of Theorique,
Which cleped is Mathematique,
Devided is in sondri wise
And stant upon diverse aprise.
The ferste of whiche is Arsmetique,
And the secounde is seid Musique, 150
The thridde is ek Geometrie,
Also the ferthe Astronomie.
Of Arsmetique the matiere
Is that of which a man mai liere
What Algorisme in nombre amonteth,
Whan that the wise man acompteth
After the formel proprete
Of Algorismes Abece:
Be which multiplicacioun
Is mad and diminucioun 160
Of sommes be thexperience
Of this Art and of this science.
The seconde of Mathematique,
Which is the science of Musique,
That techeth upon Armonie
A man to make melodie
Be vois and soun of instrument
Thurgh notes of acordement,
The whiche men pronounce alofte,
Nou scharpe notes and nou softe, 170
Nou hihe notes and nou lowe,
As be the gamme a man mai knowe,
Which techeth the prolacion
Of note and the condicion.
Mathematique of his science
Hath yit the thridde intelligence
Full of wisdom and of clergie
And cleped is Geometrie,
Thurgh which a man hath thilke sleyhte,
Of lengthe, of brede, of depthe, of heyhte 180
To knowe the proporcion
Be verrai calculacion
Of this science: and in this wise
These olde Philosophres wise,
Of al this worldes erthe round,
Hou large, hou thikke was the ground,
Controeveden thexperience;
The cercle and the circumference
Of every thing unto the hevene
Thei setten point and mesure evene. 190
Mathematique above therthe
Of hyh science hath yit the ferthe,
Which spekth upon Astronomie
And techeth of the sterres hihe,
Beginnynge upward fro the mone.
Bot ferst, as it was forto done,
This Aristotle in other thing
Unto this worthi yonge king
The kinde of every element
Which stant under the firmament, 200
Hou it is mad and in what wise,
Fro point to point he gan devise.
Tofore the creacion
Of eny worldes stacion,
Of hevene, of erthe, or eke of helle,
So as these olde bokes telle,
As soun tofore the song is set
And yit thei ben togedre knet,
Riht so the hihe pourveance
Tho hadde under his ordinance 210
A gret substance, a gret matiere,
Of which he wolde in his manere
These othre thinges make and forme.
For yit withouten eny forme
Was that matiere universal,
Which hihte Ylem in special.
Of Ylem, as I am enformed,
These elementz ben mad and formed,
Of Ylem elementz they hote
After the Scole of Aristote, 220
Of whiche if more I schal reherce,
Foure elementz ther ben diverse.
The ferste of hem men erthe calle,
Which is the lowest of hem alle,
And in his forme is schape round,
Substancial, strong, sadd and sound,
As that which mad is sufficant
To bere up al the remenant.
For as the point in a compas
Stant evene amiddes, riht so was 230
This erthe set and schal abyde,
That it may swerve to no side,
And hath his centre after the lawe
Of kinde, and to that centre drawe
Desireth every worldes thing,
If ther ne were no lettyng.
Above therthe kepth his bounde
The water, which is the secounde
Of elementz, and al withoute
It environeth therthe aboute. 240
Bot as it scheweth, noght forthi
This soubtil water myhtely,
Thogh it be of himselve softe,
The strengthe of therthe perceth ofte;
For riht as veines ben of blod
In man, riht so the water flod
Therthe of his cours makth ful of veines,
Als wel the helles as the pleines.
And that a man may sen at ije,
For wher the hulles ben most hyhe, 250
Ther mai men welle stremes finde:
So proveth it be weie of kinde
The water heyher than the lond.
And over this nou understond,
Air is the thridde of elementz,
Of whos kinde his aspirementz
Takth every lifissh creature,
The which schal upon erthe endure:
For as the fissh, if it be dreie,
Mot in defaute of water deie, 260
Riht so withouten Air on lyve
No man ne beste myhte thryve,
The which is mad of fleissh and bon;
There is outake of alle non.
This Air in Periferies thre
Divided is of such degre,
Benethe is on and on amidde,
To whiche above is set the thridde:
And upon the divisions
There ben diverse impressions 270
Of moist and ek of drye also,
Whiche of the Sonne bothe tuo
Ben drawe and haled upon hy,
And maken cloudes in the Sky,
As schewed is at mannes sihte;
Wherof be day and ek be nyhte
After the times of the yer
Among ous upon Erthe her
In sondri wise thinges falle.
The ferste Periferie of alle 280
Engendreth Myst and overmore
The dewes and the Frostes hore,
After thilke intersticion
In which thei take impression.
Fro the seconde, as bokes sein,
The moiste dropes of the reyn
Descenden into Middilerthe,
And tempreth it to sed and Erthe,
And doth to springe grass and flour.
And ofte also the grete schour 290
Out of such place it mai be take,
That it the forme schal forsake
Of reyn, and into snow be torned;
And ek it mai be so sojorned
In sondri places up alofte,
That into hail it torneth ofte.
The thridde of thair after the lawe
Thurgh such matiere as up is drawe
Of dreie thing, as it is ofte,
Among the cloudes upon lofte, 300
And is so clos, it may noght oute,—
Thanne is it chased sore aboute,
Til it to fyr and leyt be falle,
And thanne it brekth the cloudes alle,
The whiche of so gret noyse craken,
That thei the feerful thonder maken.
The thonderstrok smit er it leyte,
And yit men sen the fyr and leyte,
The thonderstrok er that men hiere:
So mai it wel be proeved hiere 310
In thing which schewed is fro feer,
A mannes yhe is there nerr
Thanne is the soun to mannes Ere.
And natheles it is gret feere
Bothe of the strok and of the fyr,
Of which is no recoverir
In place wher that thei descende,
Bot if god wolde his grace sende.
And forto speken over this,
In this partie of thair it is 320
That men fulofte sen be nyhte
The fyr in sondri forme alyhte.
Somtime the fyrdrake it semeth,
And so the lewed poeple it demeth;
Somtime it semeth as it were
A Sterre, which that glydeth there:
Bot it is nouther of the tuo,
The Philosophre telleth so,
And seith that of impressions
Thurgh diverse exalacions 330
Upon the cause and the matiere
Men sen diverse forme appiere
Of fyr, the which hath sondri name.
Assub, he seith, is thilke same,
The which in sondry place is founde,
Whanne it is falle doun to grounde,
So as the fyr it hath aneled,
Lich unto slym which is congeled.
Of exalacion I finde
Fyr kinled of the fame kinde, 340
Bot it is of an other forme;
Wherof, if that I schal conforme
The figure unto that it is,
These olde clerkes tellen this,
That it is lik a Got skippende,
And for that it is such semende,
It hatte Capra saliens.
And ek these Astronomiens
An other fyr also, be nyhte
Which scheweth him to mannes syhte, 350
Thei clepen Eges, the which brenneth
Lik to the corrant fyr that renneth
Upon a corde, as thou hast sein,
Whan it with poudre is so besein
Of Sulphre and othre thinges mo.
Ther is an other fyr also,
Which semeth to a mannes yhe
Be nyhtes time as thogh ther flyhe
A dragon brennende in the Sky,
And that is cleped proprely 360
Daaly, wherof men sein fulofte,
"Lo, wher the fyri drake alofte
Fleth up in thair!" and so thei demen.
Bot why the fyres suche semen
Of sondri formes to beholde,
The wise Philosophre tolde,
So as tofore it hath ben herd.
Lo thus, my Sone, hou it hath ferd:
Of Air the due proprete
In sondri wise thou myht se, 370
And hou under the firmament
It is ek the thridde element,
Which environeth bothe tuo,
The water and the lond also.
And forto tellen overthis
Of elementz which the ferthe is,
That is the fyr in his degre,
Which environeth thother thre
And is withoute moist al drye.
Bot lest nou what seith the clergie; 380
For upon hem that I have seid
The creatour hath set and leid
The kinde and the complexion
Of alle mennes nacion.
Foure elementz sondri ther be,
Lich unto whiche of that degre
Among the men ther ben also
Complexions foure and nomo,
Wherof the Philosophre treteth,
That he nothing behinde leteth, 390
And seith hou that thei ben diverse,
So as I schal to thee reherse.
He which natureth every kinde,
The myhti god, so as I finde,
Of man, which is his creature,
Hath so devided the nature,
That non til other wel acordeth:
And be the cause it so discordeth,
The lif which fieleth the seknesse
Mai stonde upon no sekernesse. 400
Of therthe, which is cold and drye,
The kinde of man Malencolie
Is cleped, and that is the ferste,
The most ungoodlich and the werste;
For unto loves werk on nyht
Him lacketh bothe will and myht:
No wonder is, in lusty place
Of love though he lese grace.
What man hath that complexion,
Full of ymaginacion 410
Of dredes and of wrathful thoghtes,
He fret himselven al to noghtes.
The water, which is moyste and cold,
Makth fleume, which is manyfold
Foryetel, slou and wery sone
Of every thing which is to done:
He is of kinde sufficant
To holde love his covenant,
Bot that him lacketh appetit,
Which longeth unto such delit. 420
What man that takth his kinde of thair,
He schal be lyht, he schal be fair,
For his complexion is blood.
Of alle ther is non so good,
For he hath bothe will and myht
To plese and paie love his riht:
Wher as he hath love undertake,
Wrong is if that he be forsake.
The fyr of his condicion
Appropreth the complexion 430
Which in a man is Colre hote,
Whos propretes ben dreie and hote:
It makth a man ben enginous
And swift of fote and ek irous;
Of contek and folhastifnesse
He hath a riht gret besinesse,
To thenke of love and litel may:
Though he behote wel a day,
On nyht whan that he wole assaie,
He may ful evele his dette paie. 440
After the kinde of thelement,
Thus stant a mannes kinde went,
As touchende his complexion,
Upon sondri division
Of dreie, of moiste, of chele, of hete,
And ech of hem his oghne sete
Appropred hath withinne a man.
And ferst to telle as I began,
The Splen is to Malencolie
Assigned for herbergerie: 450
The moiste fleume with his cold
Hath in the lunges for his hold
Ordeined him a propre stede,
To duelle ther as he is bede:
To the Sanguin complexion
Nature of hire inspeccion
A propre hous hath in the livere
For his duellinge mad delivere:
The dreie Colre with his hete
Be weie of kinde his propre sete 460
Hath in the galle, wher he duelleth,
So as the Philosophre telleth.
Nou over this is forto wite,
As it is in Phisique write
Of livere, of lunge, of galle, of splen,
Thei alle unto the herte ben
Servantz, and ech in his office
Entendeth to don him service,
As he which is chief lord above.
The livere makth him forto love, 470
The lunge yifth him weie of speche,
The galle serveth to do wreche,
The Splen doth him to lawhe and pleie,
Whan al unclennesse is aweie:
Lo, thus hath ech of hem his dede.
And to sustienen hem and fede
In time of recreacion,
Nature hath in creacion
The Stomach for a comun Coc
Ordeined, so as seith the boc. 480
The Stomach coc is for the halle,
And builleth mete for hem alle,
To make hem myghty forto serve
The herte, that he schal noght sterve:
For as a king in his Empire
Above alle othre is lord and Sire,
So is the herte principal,
To whom reson in special
Is yove as for the governance.
And thus nature his pourveance 490
Hath mad for man to liven hiere;
Bot god, which hath the Soule diere,
Hath formed it in other wise.
That can noman pleinli devise;
Bot as the clerkes ous enforme,
That lich to god it hath a forme,
Thurgh which figure and which liknesse
The Soule hath many an hyh noblesse
Appropred to his oghne kinde.
Bot ofte hir wittes be mad blinde 500
Al onliche of this ilke point,
That hir abydinge is conjoint
Forth with the bodi forto duelle:
That on desireth toward helle,
That other upward to the hevene;
So schul thei nevere stonde in evene,
Bot if the fleissh be overcome
And that the Soule have holi nome
The governance, and that is selde,
Whil that the fleissh him mai bewelde. 510
Al erthli thing which god began
Was only mad to serve man;
Bot he the Soule al only made
Himselven forto serve and glade.
Alle othre bestes that men finde
Thei serve unto here oghne kinde,
Bot to reson the Soule serveth;
Wherof the man his thonk deserveth
And get him with hise werkes goode
The perdurable lyves foode. 520
Of what matiere it schal be told,
A tale lyketh manyfold
The betre, if it be spoke plein:
Thus thinke I forto torne ayein
And telle plenerly therfore
Of therthe, wherof nou tofore
I spak, and of the water eke,
So as these olde clerkes spieke,
And sette proprely the bounde
After the forme of Mappemounde, 530
Thurgh which the ground be pourparties
Departed is in thre parties,
That is Asie, Aufrique, Europe,
The whiche under the hevene cope,
Als ferr as streccheth eny ground,
Begripeth al this Erthe round.
Bot after that the hihe wrieche
The water weies let out seche
And overgo the helles hye,
Which every kinde made dye 540
That upon Middelerthe stod,
Outake No and his blod,
His Sones and his doughtres thre,
Thei were sauf and so was he;—
Here names who that rede rihte,
Sem, Cam, Japhet the brethren hihte;—
And whanne thilke almyhty hond
Withdrouh the water fro the lond,
And al the rage was aweie,
And Erthe was the mannes weie, 550
The Sones thre, of whiche I tolde,
Riht after that hemselve wolde,
This world departe thei begonne.
Asie, which lay to the Sonne
Upon the Marche of orient,
Was graunted be comun assent
To Sem, which was the Sone eldeste;
For that partie was the beste
And double as moche as othre tuo.
And was that time bounded so; 560
Wher as the flod which men Nil calleth
Departeth fro his cours and falleth
Into the See Alexandrine,
Ther takth Asie ferst seisine
Toward the West, and over this
Of Canahim wher the flod is
Into the grete See rennende,
Fro that into the worldes ende
Estward, Asie it is algates,
Til that men come unto the gates 570
Of Paradis, and there ho.
And schortly for to speke it so,
Of Orient in general
Withinne his bounde Asie hath al.
And thanne upon that other syde
Westward, as it fell thilke tyde,
The brother which was hote Cham
Upon his part Aufrique nam.
Japhet Europe tho tok he,
Thus parten thei the world on thre. 580
Bot yit ther ben of londes fele
In occident as for the chele,
In orient as for the hete,
Which of the poeple be forlete
As lond desert that is unable,
For it mai noght ben habitable.
The water eke hath sondri bounde,
After the lond wher it is founde,
And takth his name of thilke londes
Wher that it renneth on the strondes: 590
Bot thilke See which hath no wane
Is cleped the gret Occeane,
Out of the which arise and come
The hyhe flodes alle and some;
Is non so litel welle spring,
Which ther ne takth his beginnyng,
And lich a man that haleth breth
Be weie of kinde, so it geth
Out of the See and in ayein,
The water, as the bokes sein. 600
Of Elementz the propretes
Hou that they stonden be degres,
As I have told, nou myht thou hiere,
Mi goode Sone, al the matiere
Of Erthe, of water, Air and fyr.
And for thou saist that thi desir
Is forto witen overmore
The forme of Aristotles lore,
He seith in his entendement,
That yit ther is an Element 610
Above the foure, and is the fifte,
Set of the hihe goddes yifte,
The which that Orbis cleped is.
And therupon he telleth this,
That as the schelle hol and sound
Encloseth al aboute round
What thing withinne an Ey belongeth,
Riht so this Orbis underfongeth
These elementz alle everychon,
Which I have spoke of on and on. 620
Bot overthis nou tak good hiede,
Mi Sone, for I wol procede
To speke upon Mathematique,
Which grounded is on Theorique.
The science of Astronomie
I thinke forto specefie,
Withoute which, to telle plein,
Alle othre science is in vein
Toward the scole of erthli thinges:
For as an Egle with his winges 630
Fleth above alle that men finde,
So doth this science in his kinde.
Benethe upon this Erthe hiere
Of alle thinges the matiere,
As tellen ous thei that ben lerned,
Of thing above it stant governed,
That is to sein of the Planetes.
The cheles bothe and ek the hetes,
The chances of the world also,
That we fortune clepen so, 640
Among the mennes nacion
Al is thurgh constellacion,
Wherof that som man hath the wele,
And som man hath deseses fele
In love als wel as othre thinges;
The stat of realmes and of kinges
In time of pes, in time of werre
It is conceived of the Sterre:
And thus seith the naturien
Which is an Astronomien. 650
Bot the divin seith otherwise,
That if men weren goode and wise
And plesant unto the godhede,
Thei scholden noght the sterres drede;
For o man, if him wel befalle,
Is more worth than ben thei alle
Towardes him that weldeth al.
Bot yit the lawe original,
Which he hath set in the natures,
Mot worchen in the creatures, 660
That therof mai be non obstacle,
Bot if it stonde upon miracle
Thurgh preiere of som holy man.
And forthi, so as I began
To speke upon Astronomie,
As it is write in the clergie,
To telle hou the planetes fare,
Som part I thenke to declare,
Mi Sone, unto thin Audience.
Astronomie is the science 670
Of wisdom and of hih connynge,
Which makth a man have knowlechinge
Of Sterres in the firmament,
Figure, cercle and moevement
Of ech of hem in sondri place,
And what betwen hem is of space,
Hou so thei moeve or stonde faste,
Al this it telleth to the laste.
Assembled with Astronomie
Is ek that ilke Astrologie 680
The which in juggementz acompteth
Theffect, what every sterre amonteth,
And hou thei causen many a wonder
To tho climatz that stonde hem under.
And forto telle it more plein,
These olde philosphres sein
That Orbis, which I spak of err,
Is that which we fro therthe a ferr
Beholde, and firmament it calle,
In which the sterres stonden alle, 690
Among the whiche in special
Planetes sefne principal
Ther ben, that mannes sihte demeth,
Bot thorizonte, as to ous semeth.
And also ther ben signes tuelve,
Whiche have her cercles be hemselve
Compassed in the zodiaque,
In which thei have here places take.
And as thei stonden in degre,
Here cercles more or lasse be, 700
Mad after the proporcion
Of therthe, whos condicion
Is set to be the foundement
To sustiene up the firmament.
And be this skile a man mai knowe,
The more that thei stonden lowe,
The more ben the cercles lasse;
That causeth why that some passe
Here due cours tofore an other.
Bot nou, mi lieve dere brother, 710
As thou desirest forto wite
What I finde in the bokes write,
To telle of the planetes sevene,
Hou that thei stonde upon the hevene
And in what point that thei ben inne,
Tak hiede, for I wol beginne,
So as the Philosophre tauhte
To Alisandre and it betauhte,
Wherof that he was fulli tawht
Of wisdom, which was him betawht. 720
Benethe alle othre stant the Mone,
The which hath with the See to done:
Of flodes hihe and ebbes lowe
Upon his change it schal be knowe;
And every fissh which hath a schelle
Mot in his governance duelle,
To wexe and wane in his degre,
As be the Mone a man mai se;
And al that stant upon the grounde
Of his moisture it mot be founde. 730
Alle othre sterres, as men finde,
Be schynende of here oghne kinde
Outake only the monelyht,
Which is noght of himselve bright,
Bot as he takth it of the Sonne.
And yit he hath noght al fulwonne
His lyht, that he nys somdiel derk;
Bot what the lette is of that werk
In Almageste it telleth this:
The Mones cercle so lowe is, 740
Wherof the Sonne out of his stage
Ne seth him noght with full visage,
For he is with the ground beschaded,
So that the Mone is somdiel faded
And may noght fully schyne cler.
Bot what man under his pouer
Is bore, he schal his places change
And seche manye londes strange:
And as of this condicion
The Mones disposicion 750
Upon the lond of Alemaigne
Is set, and ek upon Bretaigne,
Which nou is cleped Engelond;
For thei travaile in every lond.
Of the Planetes the secounde
Above the Mone hath take his bounde,
Mercurie, and his nature is this,
That under him who that bore is,
In boke he schal be studious
And in wrytinge curious, 760
And slouh and lustles to travaile
In thing which elles myhte availe:
He loveth ese, he loveth reste,
So is he noght the worthieste;
Bot yit with somdiel besinesse
His herte is set upon richesse.
And as in this condicion,
Theffect and disposicion
Of this Planete and of his chance
Is most in Burgoigne and in France. 770
Next to Mercurie, as wol befalle,
Stant that Planete which men calle
Venus, whos constellacion
Governeth al the nacion
Of lovers, wher thei spiede or non,
Of whiche I trowe thou be on:
Bot whiderward thin happes wende,
Schal this planete schewe at ende,
As it hath do to many mo,
To some wel, to some wo. 780
And natheles of this Planete
The moste part is softe and swete;
For who that therof takth his berthe,
He schal desire joie and merthe,
Gentil, courteis and debonaire,
To speke his wordes softe and faire,
Such schal he be be weie of kinde,
And overal wher he may finde
Plesance of love, his herte boweth
With al his myht and there he woweth. 790
He is so ferforth Amourous,
He not what thing is vicious
Touchende love, for that lawe
Ther mai no maner man withdrawe,
The which venerien is bore
Be weie of kinde, and therefore
Venus of love the goddesse
Is cleped: bot of wantounesse
The climat of hir lecherie
Is most commun in Lombardie. 800
Next unto this Planete of love
The brighte Sonne stant above,
Which is the hindrere of the nyht
And forthrere of the daies lyht,
As he which is the worldes ije,
Thurgh whom the lusti compaignie
Of foules be the morwe singe,
The freisshe floures sprede and springe,
The hihe tre the ground beschadeth,
And every mannes herte gladeth. 810
And for it is the hed Planete,
Hou that he sitteth in his sete,
Of what richesse, of what nobleie,
These bokes telle, and thus thei seie.
Of gold glistrende Spoke and whiel
The Sonne his carte hath faire and wiel,
In which he sitt, and is coroned
With brighte stones environed;
Of whiche if that I speke schal,
Ther be tofore in special 820
Set in the front of his corone
Thre Stones, whiche no persone
Hath upon Erthe, and the ferste is
Be name cleped Licuchis;
That othre tuo be cleped thus,
Astrices and Ceramius.
In his corone also behinde,
Be olde bokes as I finde,
Ther ben of worthi Stones thre
Set ech of hem in his degre: 830
Wherof a Cristall is that on,
Which that corone is set upon;
The seconde is an Adamant;
The thridde is noble and avenant,
Which cleped is Ydriades.
And over this yit natheles
Upon the sydes of the werk,
After the wrytinge of the clerk,
Ther sitten fyve Stones mo:
The smaragdine is on of tho, 840
Jaspis and Elitropius
And Dendides and Jacinctus.
Lo, thus the corone is beset,
Wherof it schyneth wel the bet;
And in such wise his liht to sprede
Sit with his Diademe on hede
The Sonne schynende in his carte.
And forto lede him swithe and smarte
After the bryhte daies lawe,
Ther ben ordeined forto drawe 850
Foure hors his Char and him withal,
Wherof the names telle I schal:
Eritheüs the ferste is hote,
The which is red and schyneth hote,
The seconde Acteos the bryhte,
Lampes the thridde coursier hihte,
And Philogeus is the ferthe,
That bringen lyht unto this erthe,
And gon so swift upon the hevene,
In foure and twenty houres evene 860
The carte with the bryhte Sonne
Thei drawe, so that overronne
Thei have under the cercles hihe
Al Middelerthe in such an hye.
And thus the Sonne is overal
The chief Planete imperial,
Above him and benethe him thre:
And thus betwen hem regneth he,
As he that hath the middel place
Among the Sevene, and of his face 870
Be glade alle erthly creatures,
And taken after the natures
Here ese and recreacion.
And in his constellacion
Who that is bore in special,
Of good will and of liberal
He schal be founde in alle place,
And also stonde in mochel grace
Toward the lordes forto serve
And gret profit and thonk deserve. 880
And over that it causeth yit
A man to be soubtil of wit
To worche in gold, and to be wys
In every thing which is of pris.
Bot forto speken in what cost
Of al this erthe he regneth most
As for wisdom, it is in Grece,
Wher is apropred thilke spiece.
Mars the Planete bataillous
Next to the Sonne glorious 890
Above stant, and doth mervailes
Upon the fortune of batailes.
The conquerours be daies olde
Were unto this planete holde:
Bot who that his nativite
Hath take upon the proprete
Of Martes disposicioun
Be weie of constellacioun,
He schal be fiers and folhastif
And desirous of werre and strif. 900
Bot forto telle redely
In what climat most comunly
That this planete hath his effect,
Seid is that he hath his aspect
Upon the holi lond so cast,
That there is no pes stedefast.
Above Mars upon the hevene,
The sexte Planete of the sevene,
Stant Jupiter the delicat,
Which causeth pes and no debat. 910
For he is cleped that Planete
Which of his kinde softe and swete
Attempreth al that to him longeth;
And whom this planete underfongeth
To stonde upon his regiment,
He schal be meke and pacient
And fortunat to Marchandie
And lusti to delicacie
In every thing which he schal do.
This Jupiter is cause also 920
Of the science of lyhte werkes,
And in this wise tellen clerkes
He is the Planete of delices.
Bot in Egipte of his offices
He regneth most in special:
For ther be lustes overal
Of al that to this lif befalleth;
For ther no stormy weder falleth,
Which myhte grieve man or beste,
And ek the lond is so honeste 930
That it is plentevous and plein,
Ther is non ydel ground in vein;
And upon such felicite
Stant Jupiter in his degre.
The heyeste and aboven alle
Stant that planete which men calle
Saturnus, whos complexion
Is cold, and his condicion
Causeth malice and crualte
To him the whos nativite 940
Is set under his governance.
For alle hise werkes ben grevance
And enemy to mannes hele,
In what degre that he schal dele.
His climat is in Orient,
Wher that he is most violent.
Of the Planetes by and by,
Hou that thei stonde upon the Sky,
Fro point to point as thou myht hiere,
Was Alisandre mad to liere. 950
Bot overthis touchende his lore,
Of thing that thei him tawhte more
Upon the scoles of clergie
Now herkne the Philosophie.
He which departeth dai fro nyht,
That on derk and that other lyht,
Of sevene daies made a weke,
A Monthe of foure wekes eke
He hath ordeigned in his lawe,
Of Monthes tuelve and ek forthdrawe 960
He hath also the longe yeer.
And as he sette of his pouer
Acordant to the daies sevene
Planetes Sevene upon the hevene,
As thou tofore hast herd devise,
To speke riht in such a wise,
To every Monthe be himselve
Upon the hevene of Signes tuelve
He hath after his Ordinal
Assigned on in special, 970
Wherof, so as I schal rehersen,
The tydes of the yer diversen.
Bot pleinly forto make it knowe
Hou that the Signes sitte arowe,
Ech after other be degre
In substance and in proprete
The zodiaque comprehendeth
Withinne his cercle, as it appendeth.
The ferste of whiche natheles
Be name is cleped Aries, 980
Which lich a wether of stature
Resembled is in his figure.
And as it seith in Almageste,
Of Sterres tuelve upon this beste
Ben set, wherof in his degre
The wombe hath tuo, the heved hath thre,
The Tail hath sevene, and in this wise,
As thou myht hiere me divise,
Stant Aries, which hot and drye
Is of himself, and in partie 990
He is the receipte and the hous
Of myhty Mars the bataillous.
And overmore ek, as I finde,
The creatour of alle kinde
Upon this Signe ferst began
The world, whan that he made man.
And of this constellacioun
The verray operacioun
Availeth, if a man therinne
The pourpos of his werk beginne; 1000
For thanne he hath of proprete
Good sped and gret felicite.
The tuelve Monthes of the yeer
Attitled under the pouer
Of these tuelve Signes stonde;
Wherof that thou schalt understonde
This Aries on of the tuelve
Hath March attitled for himselve,
Whan every bridd schal chese his make,
And every neddre and every Snake 1010
And every Reptil which mai moeve,
His myht assaieth forto proeve,
To crepen out ayein the Sonne,
Whan Ver his Seson hath begonne.
Taurus the seconde after this
Of Signes, which figured is
Unto a Bole, is dreie and cold;
And as it is in bokes told,
He is the hous appourtienant
To Venus, somdiel descordant. 1020
This Bole is ek with sterres set,
Thurgh whiche he hath hise hornes knet
Unto the tail of Aries,
So is he noght ther sterreles.
Upon his brest ek eyhtetiene
He hath, and ek, as it is sene,
Upon his tail stonde othre tuo.
His Monthe assigned ek also
Is Averil, which of his schoures
Ministreth weie unto the floures. 1030
The thridde signe is Gemini,
Which is figured redely
Lich to tuo twinnes of mankinde,
That naked stonde; and as I finde,
Thei be with Sterres wel bego:
The heved hath part of thilke tuo
That schyne upon the boles tail,
So be thei bothe of o parail;
But on the wombe of Gemini
Ben fyve sterres noght forthi, 1040
And ek upon the feet be tweie,
So as these olde bokes seie,
That wise Tholomeus wrot.
His propre Monthe wel I wot
Assigned is the lusti Maii,
Whanne every brid upon his lay
Among the griene leves singeth,
And love of his pointure stingeth
After the lawes of nature
The youthe of every creature. 1050
Cancer after the reule and space
Of Signes halt the ferthe place.
Like to the crabbe he hath semblance,
And hath unto his retienance
Sextiene sterres, wherof ten,
So as these olde wise men
Descrive, he berth on him tofore,
And in the middel tuo be bore,
And foure he hath upon his ende.
Thus goth he sterred in his kende, 1060
And of himself is moiste and cold,
And is the propre hous and hold
Which appartieneth to the Mone,
And doth what longeth him to done.
The Monthe of Juin unto this Signe
Thou schalt after the reule assigne.
The fifte Signe is Leo hote,
Whos kinde is schape dreie and hote,
In whom the Sonne hath herbergage.
And the semblance of his ymage 1070
Is a leoun, which in baillie
Of sterres hath his pourpartie:
The foure, which as Cancer hath
Upon his ende, Leo tath
Upon his heved, and thanne nest
He hath ek foure upon his brest,
And on upon his tail behinde,
In olde bokes as we finde.
His propre Monthe is Juyl be name,
In which men pleien many a game. 1080
After Leo Virgo the nexte
Of Signes cleped is the sexte,
Wherof the figure is a Maide;
And as the Philosophre saide,
Sche is the welthe and the risinge,
The lust, the joie and the likinge
Unto Mercurie: and soth to seie
Sche is with sterres wel beseie,
Wherof Leo hath lent hire on,
Which sit on hih hir heved upon, 1090
Hire wombe hath fyve, hir feet also
Have other fyve: and overmo
Touchende as of complexion,
Be kindly disposicion
Of dreie and cold this Maiden is.
And forto tellen over this
Hir Monthe, thou schalt understonde,
Whan every feld hath corn in honde
And many a man his bak hath plied,
Unto this Signe is Augst applied. 1100
After Virgo to reknen evene
Libra sit in the nombre of sevene,
Which hath figure and resemblance
Unto a man which a balance
Berth in his hond as forto weie:
In boke and as it mai be seie,
Diverse sterres to him longeth,
Wherof on hevede he underfongeth
Ferst thre, and ek his wombe hath tuo,
And doun benethe eighte othre mo. 1110
This Signe is hot and moiste bothe,
The whiche thinges be noght lothe
Unto Venus, so that alofte
Sche resteth in his hous fulofte,
And ek Saturnus often hyed
Is in this Signe and magnefied.
His propre Monthe is seid Septembre,
Which yifth men cause to remembre,
If eny Sor be left behinde
Of thing which grieve mai to kinde. 1120
Among the Signes upon heighte
The Signe which is nombred eighte
Is Scorpio, which as feloun
Figured is a Scorpioun.
Bot for al that yit natheles
Is Scorpio noght sterreles;
For Libra granteth him his ende
Of eighte sterres, wher he wende,
The whiche upon his heved assised
He berth, and ek ther ben divised 1130
Upon his wombe sterres thre,
And eighte upon his tail hath he.
Which of his kinde is moiste and cold
And unbehovely manyfold;
He harmeth Venus and empeireth,
Bot Mars unto his hous repeireth,
Bot war whan thei togedre duellen.
His propre Monthe is, as men tellen,
Octobre, which bringth the kalende
Of wynter, that comth next suiende. 1140
The nynthe Signe in nombre also,
Which folweth after Scorpio,
Is cleped Sagittarius,
The whos figure is marked thus,
A Monstre with a bowe on honde:
On whom that sondri sterres stonde,
Thilke eighte of whiche I spak tofore,
The whiche upon the tail ben bore
Of Scorpio, the heved al faire
Bespreden of the Sagittaire; 1150
And eighte of othre stonden evene
Upon his wombe, and othre sevene
Ther stonde upon his tail behinde.
And he is hot and dreie of kinde:
To Jupiter his hous is fre,
Bot to Mercurie in his degre,
For thei ben noght of on assent,
He worcheth gret empeirement.
This Signe hath of his proprete
A Monthe, which of duete 1160
After the sesoun that befalleth
The Plowed Oxe in wynter stalleth;
And fyr into the halle he bringeth,
And thilke drinke of which men singeth,
He torneth must into the wyn;
Thanne is the larder of the swyn;
That is Novembre which I meene,
Whan that the lef hath lost his greene.
The tenthe Signe dreie and cold,
The which is Capricornus told, 1170
Unto a Got hath resemblance:
For whos love and whos aqueintance
Withinne hise houses to sojorne
It liketh wel unto Satorne,
Bot to the Mone it liketh noght,
For no profit is there wroght.
This Signe as of his proprete
Upon his heved hath sterres thre,
And ek upon his wombe tuo,
And tweie upon his tail also. 1180
Decembre after the yeeres forme,
So as the bokes ous enforme,
With daies schorte and nyhtes longe
This ilke Signe hath underfonge.
Of tho that sitte upon the hevene
Of Signes in the nombre ellevene
Aquarius hath take his place,
And stant wel in Satornes grace,
Which duelleth in his herbergage,
Bot to the Sonne he doth oultrage. 1190
This Signe is verraily resembled
Lich to a man which halt assembled
In eyther hand a water spoute,
Wherof the stremes rennen oute.
He is of kinde moiste and hot,
And he that of the sterres wot
Seith that he hath of sterres tuo
Upon his heved, and ben of tho
That Capricorn hath on his ende;
And as the bokes maken mende, 1200
That Tholomeus made himselve,
He hath ek on his wombe tuelve,
And tweie upon his ende stonde.
Thou schalt also this understonde,
The frosti colde Janever,
Whan comen is the newe yeer,
That Janus with his double face
In his chaiere hath take his place
And loketh upon bothe sides,
Somdiel toward the wynter tydes, 1210
Somdiel toward the yeer suiende,
That is the Monthe belongende
Unto this Signe, and of his dole
He yifth the ferste Primerole.
The tuelfthe, which is last of alle
Of Signes, Piscis men it calle,
The which, as telleth the scripture,
Berth of tuo fisshes the figure.
So is he cold and moiste of kinde,
And ek with sterres, as I finde, 1220
Beset in sondri wise, as thus:
Tuo of his ende Aquarius
Hath lent unto his heved, and tuo
This Signe hath of his oghne also
Upon his wombe, and over this
Upon his ende also ther is
A nombre of twenty sterres bryghte,
Which is to sen a wonder sighte.
Toward this Signe into his hous
Comth Jupiter the glorious, 1230
And Venus ek with him acordeth
To duellen, as the bok recordeth.
The Monthe unto this Signe ordeined
Is Februer, which is bereined,
And with londflodes in his rage
At Fordes letteth the passage.
Nou hast thou herd the proprete
Of Signes, bot in his degre
Albumazar yit over this
Seith, so as therthe parted is 1240
In foure, riht so ben divised
The Signes tuelve and stonde assised,
That ech of hem for his partie
Hath his climat to justefie.
Wherof the ferste regiment
Toward the part of Orient
From Antioche and that contre
Governed is of Signes thre,
That is Cancer, Virgo, Leo:
And toward Occident also 1250
From Armenie, as I am lerned,
Of Capricorn it stant governed,
Of Pisces and Aquarius:
And after hem I finde thus,
Southward from Alisandre forth
Tho Signes whiche most ben worth
In governance of that doaire,
Libra thei ben and Sagittaire
With Scorpio, which is conjoint
With hem to stonde upon that point: 1260
Constantinople the Cite,
So as the bokes tellen me,
The laste of this division
Stant untoward Septemtrion,
Wher as be weie of pourveance
Hath Aries the governance
Forth with Taurus and Gemini.
Thus ben the Signes propreli
Divided, as it is reherced,
Wherof the londes ben diversed. 1270
Lo thus, mi Sone, as thou myht hiere,
Was Alisandre mad to liere
Of hem that weren for his lore.
But nou to loken overmore,
Of othre sterres hou thei fare
I thenke hierafter to declare,
So as king Alisandre in youthe
Of him that suche thinges couthe
Enformed was tofore his yhe
Be nyhte upon the sterres hihe. 1280
Upon sondri creacion
Stant sondri operacion,
Som worcheth this, som worcheth that;
The fyr is hot in his astat
And brenneth what he mai atteigne,
The water mai the fyr restreigne,
The which is cold and moist also.
Of other thing it farth riht so
Upon this erthe among ous here;
And forto speke in this manere, 1290
Upon the hevene, as men mai finde,
The sterres ben of sondri kinde
And worchen manye sondri thinges
To ous, that ben here underlinges.
Among the whiche forth withal
Nectanabus in special,
Which was an Astronomien
And ek a gret Magicien,
And undertake hath thilke emprise
To Alisandre in his aprise 1300
As of Magique naturel
To knowe, enformeth him somdel
Of certein sterres what thei mene;
Of whiche, he seith, ther ben fiftene,
And sondrily to everich on
A gras belongeth and a Ston,
Wherof men worchen many a wonder
To sette thing bothe up and under.
To telle riht as he began,
The ferste sterre Aldeboran, 1310
The cliereste and the moste of alle,
Be rihte name men it calle;
Which lich is of condicion
To Mars, and of complexion
To Venus, and hath therupon
Carbunculum his propre Ston:
His herbe is Anabulla named,
Which is of gret vertu proclamed.
The seconde is noght vertules;
Clota or elles Pliades 1320
It hatte, and of the mones kinde
He is, and also this I finde,
He takth of Mars complexion:
And lich to such condicion
His Ston appropred is Cristall,
And ek his herbe in special
The vertuous Fenele it is.
The thridde, which comth after this,
Is hote Algol the clere rede,
Which of Satorne, as I may rede, 1330
His kinde takth, and ek of Jove
Complexion to his behove.
His propre Ston is Dyamant,
Which is to him most acordant;
His herbe, which is him betake,
Is hote Eleborum the blake.
So as it falleth upon lot,
The ferthe sterre is Alhaiot,
Which in the wise as I seide er
Of Satorne and of Jupiter 1340
Hath take his kinde; and therupon
The Saphir is his propre Ston,
Marrubium his herbe also,
The whiche acorden bothe tuo.
And Canis maior in his like
The fifte sterre is of Magique,
The whos kinde is venerien,
As seith this Astronomien.
His propre Ston is seid Berille,
Bot forto worche and to fulfille 1350
Thing which to this science falleth,
Ther is an herbe which men calleth
Saveine, and that behoveth nede
To him that wole his pourpos spede.
The sexte suiende after this
Be name Canis minor is;
The which sterre is Mercurial
Be weie of kinde, and forth withal,
As it is writen in the carte,
Complexion he takth of Marte. 1360
His Ston and herbe, as seith the Scole,
Ben Achates and Primerole.
The sefnthe sterre in special
Of this science is Arial,
Which sondri nature underfongeth.
The Ston which propre unto him longeth,
Gorgonza proprely it hihte:
His herbe also, which he schal rihte
Upon the worchinge as I mene,
Is Celidoine freissh and grene. 1370
Sterre Ala Corvi upon heihte
Hath take his place in nombre of eighte,
Which of his kinde mot parforne
The will of Marte and of Satorne:
To whom Lapacia the grete
Is herbe, bot of no beyete;
His Ston is Honochinus hote,
Thurgh which men worchen gret riote.
The nynthe sterre faire and wel
Be name is hote Alaezel, 1380
Which takth his propre kinde thus
Bothe of Mercurie and of Venus.
His Ston is the grene Amyraude,
To whom is yoven many a laude:
Salge is his herbe appourtenant
Aboven al the rememant.
The tenthe sterre is Almareth,
Which upon lif and upon deth
Thurgh kinde of Jupiter and Mart
He doth what longeth to his part. 1390
His Ston is Jaspe, and of Planteine
He hath his herbe sovereine.
The sterre ellefthe is Venenas,
The whos nature is as it was
Take of Venus and of the Mone,
In thing which he hath forto done.
Of Adamant is that perrie
In which he worcheth his maistrie;
Thilke herbe also which him befalleth,
Cicorea the bok it calleth. 1400
Alpheta in the nombre sit,
And is the twelfthe sterre yit;
Of Scorpio which is governed,
And takth his kinde, as I am lerned;
And hath his vertu in the Ston
Which cleped is Topazion:
His herbe propre is Rosmarine,
Which schapen is for his covine.
Of these sterres, whiche I mene,
Cor Scorpionis is thritiene; 1410
The whos nature Mart and Jove
Have yoven unto his behove.
His herbe is Aristologie,
Which folweth his Astronomie:
The Ston which that this sterre alloweth,
Is Sardis, which unto him boweth.
The sterre which stant next the laste,
Nature on him this name caste
And clepeth him Botercadent;
Which of his kinde obedient 1420
Is to Mercurie and to Venus.
His Ston is seid Crisolitus,
His herbe is cleped Satureie,
So as these olde bokes seie.
Bot nou the laste sterre of alle
The tail of Scorpio men calle,
Which to Mercurie and to Satorne
Be weie of kinde mot retorne
After the preparacion
Of due constellacion. 1430
The Calcedoine unto him longeth,
Which for his Ston he underfongeth;
Of Majorane his herbe is grounded.
Thus have I seid hou thei be founded,
Of every sterre in special,
Which hath his herbe and Ston withal,
As Hermes in his bokes olde
Witnesse berth of that I tolde.
The science of Astronomie,
Which principal is of clergie 1440
To dieme betwen wo and wel
In thinges that be naturel,
Thei hadde a gret travail on honde
That made it ferst ben understonde;
And thei also which overmore
Here studie sette upon this lore,
Thei weren gracious and wys
And worthi forto bere a pris.
And whom it liketh forto wite
Of hem that this science write, 1450
On of the ferste which it wrot
After No, it was Nembrot,
To his disciple Ychonithon
And made a bok forth therupon
The which Megaster cleped was.
An other Auctor in this cas
Is Arachel, the which men note;
His bok is Abbategnyh hote.
Danz Tholome is noght the leste,
Which makth the bok of Almageste; 1460
And Alfraganus doth the same,
Whos bok is Chatemuz be name.
Gebuz and Alpetragus eke
Of Planisperie, which men seke,
The bokes made: and over this
Ful many a worthi clerc ther is,
That writen upon this clergie
The bokes of Altemetrie,
Planemetrie and ek also,
Whiche as belongen bothe tuo, 1470
So as thei ben naturiens,
Unto these Astronomiens.
Men sein that Habraham was on;
Bot whether that he wrot or non,
That finde I noght; and Moises
Ek was an other: bot Hermes
Above alle othre in this science
He hadde a gret experience;
Thurgh him was many a sterre assised,
Whos bokes yit ben auctorized. 1480
I mai noght knowen alle tho
That writen in the time tho
Of this science; bot I finde,
Of jugement be weie of kinde
That in o point thei alle acorden:
Of sterres whiche thei recorden
That men mai sen upon the hevene,
Ther ben a thousend sterres evene
And tuo and twenty, to the syhte
Whiche aren of hemself so bryhte, 1490
That men mai dieme what thei be,
The nature and the proprete.
Nou hast thou herd, in which a wise
These noble Philosophres wise
Enformeden this yonge king,
And made him have a knowleching
Of thing which ferst to the partie
Belongeth of Philosophie,
Which Theorique cleped is,
As thou tofore hast herd er this. 1500
Bot nou to speke of the secounde,
Which Aristotle hath also founde,
And techeth hou to speke faire,
Which is a thing full necessaire
To contrepeise the balance,
Wher lacketh other sufficance.
Above alle erthli creatures
The hihe makere of natures
The word to man hath yove alone,
So that the speche of his persone, 1510
Or forto lese or forto winne,
The hertes thoght which is withinne
Mai schewe, what it wolde mene;
And that is noghwhere elles sene
Of kinde with non other beste.
So scholde he be the more honeste,
To whom god yaf so gret a yifte,
And loke wel that he ne schifte
Hise wordes to no wicked us;
For word the techer of vertus 1520
Is cleped in Philosophie.
Wherof touchende this partie,
Is Rethorique the science
Appropred to the reverence
Of wordes that ben resonable:
And for this art schal be vailable
With goodli wordes forto like,
It hath Gramaire, it hath Logiqe,
That serven bothe unto the speche.
Gramaire ferste hath forto teche 1530
To speke upon congruite:
Logique hath eke in his degre
Betwen the trouthe and the falshode
The pleine wordes forto schode,
So that nothing schal go beside,
That he the riht ne schal decide.
Wherof full many a gret debat
Reformed is to good astat,
And pes sustiened up alofte
With esy wordes and with softe, 1540
Wher strengthe scholde lete it falle.
The Philosophre amonges alle
Forthi commendeth this science,
Which hath the reule of eloquence.
In Ston and gras vertu ther is,
Bot yit the bokes tellen this,
That word above alle erthli thinges
Is vertuous in his doinges,
Wher so it be to evele or goode.
For if the wordes semen goode 1550
And ben wel spoke at mannes Ere,
Whan that ther is no trouthe there,
Thei don fulofte gret deceipte;
For whan the word to the conceipte
Descordeth in so double a wise,
Such Rethorique is to despise
In every place, and forto drede.
For of Uluxes thus I rede,
As in the bok of Troie is founde,
His eloquence and his facounde 1560
Of goodly wordes whiche he tolde,
Hath mad that Anthenor him solde
The toun, which he with tresoun wan.
Word hath beguiled many a man;
With word the wilde beste is daunted,
With word the Serpent is enchaunted,
Of word among the men of Armes
Ben woundes heeled with the charmes,
Wher lacketh other medicine;
Word hath under his discipline 1570
Of Sorcerie the karectes.
The wordes ben of sondri sectes,
Of evele and eke of goode also;
The wordes maken frend of fo,
And fo of frend, and pes of werre,
And werre of pes, and out of herre
The word this worldes cause entriketh,
And reconsileth whan him liketh.
The word under the coupe of hevene
Set every thing or odde or evene; 1580
With word the hihe god is plesed,
With word the wordes ben appesed,
The softe word the loude stilleth;
Wher lacketh good, the word fulfilleth,
To make amendes for the wrong;
Whan wordes medlen with the song,
It doth plesance wel the more.
Bot forto loke upon the lore
Hou Tullius his Rethorique
Componeth, ther a man mai pike 1590
Hou that he schal hise wordes sette,
Hou he schal lose, hou he schal knette,
And in what wise he schal pronounce
His tale plein withoute frounce.
Wherof ensample if thou wolt seche,
Tak hiede and red whilom the speche
Of Julius and Cithero,
Which consul was of Rome tho,
Of Catoun eke and of Cillene,
Behold the wordes hem betwene, 1600
Whan the tresoun of Cateline
Descoevered was, and the covine
Of hem that were of his assent
Was knowe and spoke in parlement,
And axed hou and in what wise
Men scholde don hem to juise.
Cillenus ferst his tale tolde,
To trouthe and as he was beholde,
The comun profit forto save,
He seide hou tresoun scholde have 1610
A cruel deth; and thus thei spieke,
The Consul bothe and Catoun eke,
And seiden that for such a wrong
Ther mai no peine be to strong.
Bot Julius with wordes wise
His tale tolde al otherwise,
As he which wolde her deth respite,
And fondeth hou he mihte excite
The jugges thurgh his eloquence
Fro deth to torne the sentence 1620
And sette here hertes to pite.
Nou tolden thei, nou tolde he;
Thei spieken plein after the lawe,
Bot he the wordes of his sawe
Coloureth in an other weie
Spekende, and thus betwen the tweie,
To trete upon this juggement,
Made ech of hem his Argument.
Wherof the tales forto hiere,
Ther mai a man the Scole liere 1630
Of Rethoriqes eloquences,
Which is the secounde of sciences
Touchende to Philosophie;
Wherof a man schal justifie
Hise wordes in disputeisoun,
And knette upon conclusioun
His Argument in such a forme,
Which mai the pleine trouthe enforme
And the soubtil cautele abate,
Which every trewman schal debate. 1640
The ferste, which is Theorique,
And the secounde Rethorique,
Sciences of Philosophie,
I have hem told as in partie,
So as the Philosophre it tolde
To Alisandre: and nou I wolde
Telle of the thridde what it is,
The which Practique cleped is.
Practique stant upon thre thinges
Toward the governance of kinges; 1650
Wherof the ferst Etique is named,
The whos science stant proclamed
To teche of vertu thilke reule,
Hou that a king himself schal reule
Of his moral condicion
With worthi disposicion
Of good livinge in his persone,
Which is the chief of his corone.
It makth a king also to lerne
Hou he his bodi schal governe, 1660
Hou he schal wake, hou he schal slepe,
Hou that he schal his hele kepe
In mete, in drinke, in clothinge eke:
Ther is no wisdom forto seke
As for the reule of his persone,
The which that this science al one
Ne techeth as be weie of kinde,
That ther is nothing left behinde.
That other point which to Practique
Belongeth is Iconomique, 1670
Which techeth thilke honestete
Thurgh which a king in his degre
His wif and child schal reule and guie,
So forth with al the companie
Which in his houshold schal abyde,
And his astat on every syde
In such manere forto lede,
That he his houshold ne mislede.
Practique hath yit the thridde aprise,
Which techeth hou and in what wise 1680
Thurgh hih pourveied ordinance
A king schal sette in governance
His Realme, and that is Policie,
Which longeth unto Regalie
In time of werre, in time of pes,
To worschipe and to good encress
Of clerk, of kniht and of Marchant,
And so forth of the remenant
Of al the comun poeple aboute,
Withinne Burgh and ek withoute, 1690
Of hem that ben Artificiers,
Whiche usen craftes and mestiers,
Whos Art is cleped Mechanique.
And though thei ben noght alle like,
Yit natheles, hou so it falle,
O lawe mot governe hem alle,
Or that thei lese or that thei winne,
After thastat that thei ben inne.
Lo, thus this worthi yonge king
Was fulli tauht of every thing, 1700
Which mihte yive entendement
Of good reule and good regiment
To such a worthi Prince as he.
Bot of verray necessite
The Philosophre him hath betake
Fyf pointz, whiche he hath undertake
To kepe and holde in observance,
As for the worthi governance
Which longeth to his Regalie,
After the reule of Policie. 1710
To every man behoveth lore,
Bot to noman belongeth more
Than to a king, which hath to lede
The poeple; for of his kinghede
He mai hem bothe save and spille.
And for it stant upon his wille,
It sit him wel to ben avised,
And the vertus whiche are assissed
Unto a kinges Regiment,
To take in his entendement: 1720
Wherof to tellen, as thei stonde,
Hierafterward nou woll I fonde.
Among the vertus on is chief,
And that is trouthe, which is lief
To god and ek to man also.
And for it hath ben evere so,
Tawhte Aristotle, as he wel couthe,
To Alisandre, hou in his youthe
He scholde of trouthe thilke grace
With al his hole herte embrace, 1730
So that his word be trewe and plein,
Toward the world and so certein
That in him be no double speche:
For if men scholde trouthe seche
And founde it noght withinne a king,
It were an unsittende thing.
The word is tokne of that withinne,
Ther schal a worthi king beginne
To kepe his tunge and to be trewe,
So schal his pris ben evere newe. 1740
Avise him every man tofore,
And be wel war, er he be swore,
For afterward it is to late,
If that he wole his word debate.
For as a king in special
Above alle othre is principal
Of his pouer, so scholde he be
Most vertuous in his degre;
And that mai wel be signefied
Be his corone and specified. 1750
The gold betokneth excellence,
That men schull don him reverence
As to here liege soverein.
The Stones, as the bokes sein,
Commended ben in treble wise:
Ferst thei ben harde, and thilke assisse
Betokneth in a king Constance,
So that ther schal no variance
Be founde in his condicion;
And also be descripcion 1760
The vertu which is in the stones
A verrai Signe is for the nones
Of that a king schal ben honeste
And holde trewly his beheste
Of thing which longeth to kinghede:
The bryhte colour, as I rede,
Which in the stones is schynende,
Is in figure betoknende
The Cronique of this worldes fame,
Which stant upon his goode name. 1770
The cercle which is round aboute
Is tokne of al the lond withoute,
Which stant under his Gerarchie,
That he it schal wel kepe and guye.
And for that trouthe, hou so it falle,
Is the vertu soverein of alle,
That longeth unto regiment,
A tale, which is evident
Of trouthe in comendacioun,
Toward thin enformacion, 1780
Mi Sone, hierafter thou schalt hiere
Of a Cronique in this matiere.
As the Cronique it doth reherce,
A Soldan whilom was of Perce,
Which Daires hihte, and Ytaspis
His fader was; and soth it is
That thurgh wisdom and hih prudence
Mor than for eny reverence
Of his lignage as be descente
The regne of thilke empire he hente: 1790
And as he was himselve wys,
The wisemen he hield in pris
And soghte hem oute on every side,
That toward him thei scholde abide.
Among the whiche thre ther were
That most service unto him bere,
As thei which in his chambre lyhen
And al his conseil herde and syhen.
Here names ben of strange note,
Arpaghes was the ferste hote, 1800
And Manachaz was the secounde,
Zorobabel, as it is founde
In the Cronique, was the thridde.
This Soldan, what so him betidde,
To hem he triste most of alle,
Wherof the cas is so befalle:
This lord, which hath conceiptes depe,
Upon a nyht whan he hath slepe,
As he which hath his wit desposed,
Touchende a point hem hath opposed. 1810
The kinges question was this;
Of thinges thre which strengest is,
The wyn, the womman or the king:
And that thei scholde upon this thing
Of here ansuere avised be,
He yaf hem fulli daies thre,
And hath behote hem be his feith
That who the beste reson seith,
He schal receive a worthi mede.
Upon this thing thei token hiede 1820
And stoden in desputeison,
That be diverse opinion
Of Argumentz that thei have holde
Arpaghes ferst his tale tolde,
And seide hou that the strengthe of kinges
Is myhtiest of alle thinges.
For king hath pouer over man,
And man is he which reson can,
As he which is of his nature
The moste noble creature 1830
Of alle tho that god hath wroght:
And be that skile it semeth noght,
He seith, that eny erthly thing
Mai be so myhty as a king.
A king mai spille, a king mai save,
A king mai make of lord a knave
And of a knave a lord also:
The pouer of a king stant so,
That he the lawes overpasseth;
What he wol make lasse, he lasseth, 1840
What he wol make more, he moreth;
And as the gentil faucon soreth,
He fleth, that noman him reclameth;
Bot he al one alle othre tameth,
And stant himself of lawe fre.
Lo, thus a kinges myht, seith he,
So as his reson can argue,
Is strengest and of most value.
Bot Manachaz seide otherwise,
That wyn is of the more emprise; 1850
And that he scheweth be this weie.
The wyn fulofte takth aweie
The reson fro the mannes herte;
The wyn can make a krepel sterte,
And a delivere man unwelde;
It makth a blind man to behelde,
And a bryht yhed seme derk;
It makth a lewed man a clerk,
And fro the clerkes the clergie
It takth aweie, and couardie 1860
It torneth into hardiesse;
Of Avarice it makth largesse.
The wyn makth ek the goode blod,
In which the Soule which is good
Hath chosen hire a resting place,
Whil that the lif hir wole embrace.
And be this skile Manachas
Ansuered hath upon this cas,
And seith that wyn be weie of kinde
Is thing which mai the hertes binde 1870
Wel more than the regalie.
Zorobabel for his partie
Seide, as him thoghte for the beste,
That wommen ben the myhtieste.
The king and the vinour also
Of wommen comen bothe tuo;
And ek he seide hou that manhede
Thurgh strengthe unto the wommanhede
Of love, wher he wole or non,
Obeie schal; and therupon, 1880
To schewe of wommen the maistrie,
A tale which he syh with yhe
As for ensample he tolde this,—
Hou Apemen, of Besazis
Which dowhter was, in the paleis
Sittende upon his hihe deis,
Whan he was hotest in his ire
Toward the grete of his empire,
Cirus the king tirant sche tok,
And only with hire goodly lok 1890
Sche made him debonaire and meke,
And be the chyn and be the cheke
Sche luggeth him riht as hir liste,
That nou sche japeth, nou sche kiste,
And doth with him what evere hir liketh;
Whan that sche loureth, thanne he siketh,
And whan sche gladeth, he is glad:
And thus this king was overlad
With hire which his lemman was.
Among the men is no solas, 1900
If that ther be no womman there;
For bot if that the wommen were,
This worldes joie were aweie:
Thurgh hem men finden out the weie
To knihthode and to worldes fame;
Thei make a man to drede schame,
And honour forto be desired:
Thurgh the beaute of hem is fyred
The Dart of which Cupide throweth,
Wherof the jolif peine groweth, 1910
Which al the world hath under fote.
A womman is the mannes bote,
His lif, his deth, his wo, his wel;
And this thing mai be schewed wel,
Hou that wommen ben goode and kinde,
For in ensample this I finde.
Whan that the duk Ametus lay
Sek in his bedd, that every day
Men waiten whan he scholde deie,
Alceste his wif goth forto preie, 1920
As sche which wolde thonk deserve,
With Sacrifice unto Minerve,
To wite ansuere of the goddesse
Hou that hir lord of his seknesse,
Wherof he was so wo besein,
Recovere myhte his hele ayein.
Lo, thus sche cride and thus sche preide,
Til ate laste a vois hir seide,
That if sche wolde for his sake
The maladie soffre and take, 1930
And deie hirself, he scholde live.
Of this ansuere Alceste hath yive
Unto Minerve gret thonkinge,
So that hir deth and his livinge
Sche ches with al hire hole entente,
And thus acorded hom sche wente.
Into the chambre and whan sche cam,
Hire housebonde anon sche nam
In bothe hire Armes and him kiste,
And spak unto him what hire liste; 1940
And therupon withinne a throwe
This goode wif was overthrowe
And deide, and he was hool in haste.
So mai a man be reson taste,
Hou next after the god above
The trouthe of wommen and the love,
In whom that alle grace is founde,
Is myhtiest upon this grounde
And most behovely manyfold.
Lo, thus Zorobabel hath told 1950
The tale of his opinion:
Bot for final conclusion
What strengest is of erthli thinges,
The wyn, the wommen or the kinges,
He seith that trouthe above hem alle
Is myhtiest, hou evere it falle.
The trouthe, hou so it evere come,
Mai for nothing ben overcome;
It mai wel soffre for a throwe,
Bot ate laste it schal be knowe. 1960
The proverbe is, who that is trewe,
Him schal his while nevere rewe:
For hou so that the cause wende,
The trouthe is schameles ate ende,
Bot what thing that is troutheles,
It mai noght wel be schameles,
And schame hindreth every wyht:
So proveth it, ther is no myht
Withoute trouthe in no degre.
And thus for trouthe of his decre 1970
Zorobabel was most commended,
Wherof the question was ended,
And he resceived hath his mede
For trouthe, which to mannes nede
Is most behoveliche overal.
Forthi was trouthe in special
The ferste point in observance
Betake unto the governance
Of Alisandre, as it is seid:
For therupon the ground is leid 1980
Of every kinges regiment,
As thing which most convenient
Is forto sette a king in evene
Bothe in this world and ek in hevene.
Next after trouthe the secounde,
In Policie as it is founde,
Which serveth to the worldes fame
In worschipe of a kinges name,
Largesse it is, whos privilegge
Ther mai non Avarice abregge. 1990
The worldes good was ferst comune,
Bot afterward upon fortune
Was thilke comun profit cessed:
For whan the poeple stod encresced
And the lignages woxen grete,
Anon for singulier beyete
Drouh every man to his partie;
Wherof cam in the ferste envie
With gret debat and werres stronge,
And laste among the men so longe, 2000
Til noman wiste who was who,
Ne which was frend ne which was fo.
Til ate laste in every lond
Withinne hemself the poeple fond
That it was good to make a king,
Which mihte appesen al this thing
And yive riht to the lignages
In partinge of here heritages
And ek of al here other good;
And thus above hem alle stod 2010
The king upon his Regalie,
As he which hath to justifie
The worldes good fro covoitise.
So sit it wel in alle wise
A king betwen the more and lesse
To sette his herte upon largesse
Toward himself and ek also
Toward his poeple; and if noght so,
That is to sein, if that he be
Toward himselven large and fre 2020
And of his poeple take and pile,
Largesse be no weie of skile
It mai be seid, bot Avarice,
Which in a king is a gret vice.
A king behoveth ek to fle
The vice of Prodegalite,
That he mesure in his expence
So kepe, that of indigence
He mai be sauf: for who that nedeth,
In al his werk the worse he spedeth. 2030
As Aristotle upon Chaldee
Ensample of gret Auctorite
Unto king Alisandre tauhte
Of thilke folk that were unsauhte
Toward here king for his pilage:
Wherof he bad, in his corage
That he unto thre pointz entende,
Wher that he wolde his good despende.
Ferst scholde he loke, hou that it stod,
That al were of his oghne good 2040
The yiftes whiche he wolde yive;
So myhte he wel the betre live:
And ek he moste taken hiede
If ther be cause of eny nede,
Which oghte forto be defended,
Er that his goodes be despended:
He mot ek, as it is befalle,
Amonges othre thinges alle
Se the decertes of his men;
And after that thei ben of ken 2050
And of astat and of merite,
He schal hem largeliche aquite,
Or for the werre, or for the pes,
That non honour falle in descres,
Which mihte torne into defame,
Bot that he kepe his goode name,
So that he be noght holde unkinde.
For in Cronique a tale I finde,
Which spekth somdiel of this matiere,
Hierafterward as thou schalt hiere. 2060
In Rome, to poursuie his riht,
Ther was a worthi povere kniht,
Which cam al one forto sein
His cause, when the court was plein,
Wher Julius was in presence.
And for him lacketh of despence,
Ther was with him non advocat
To make ple for his astat.
Bot thogh him lacke forto plede,
Him lacketh nothing of manhede; 2070
He wiste wel his pours was povere,
Bot yit he thoghte his riht recovere,
And openly poverte alleide,
To themperour and thus he seide:
"O Julius, lord of the lawe,
Behold, mi conseil is withdrawe
For lacke of gold: do thin office
After the lawes of justice:
Help that I hadde conseil hiere
Upon the trouthe of mi matiere." 2080
And Julius with that anon
Assigned him a worthi on,
Bot he himself no word ne spak.
This kniht was wroth and fond a lak
In themperour, and seide thus:
"O thou unkinde Julius,
Whan thou in thi bataille were
Up in Aufrique, and I was there,
Mi myht for thi rescousse I dede
And putte noman in my stede, 2090
Thou wost what woundes ther I hadde:
Bot hier I finde thee so badde,
That thee ne liste speke o word
Thin oghne mouth, nor of thin hord
To yive a florin me to helpe.
Hou scholde I thanne me beyelpe
Fro this dai forth of thi largesse,
Whan such a gret unkindenesse
Is founde in such a lord as thou?"
This Julius knew wel ynou 2100
That al was soth which he him tolde;
And for he wolde noght ben holde
Unkinde, he tok his cause on honde,
And as it were of goddes sonde,
He yaf him good ynouh to spende
For evere into his lives ende.
And thus scholde every worthi king
Take of his knihtes knowleching,
Whan that he syh thei hadden nede,
For every service axeth mede: 2110
Bot othre, which have noght deserved
Thurgh vertu, bot of japes served,
A king schal noght deserve grace,
Thogh he be large in such a place.
It sit wel every king to have
Discrecion, whan men him crave,
So that he mai his yifte wite:
Wherof I finde a tale write,
Hou Cinichus a povere kniht
A Somme which was over myht 2120
Preide of his king Antigonus.
The king ansuerde to him thus,
And seide hou such a yifte passeth
His povere astat: and thanne he lasseth,
And axeth bot a litel peny,
If that the king wol yive him eny.
The king ansuerde, it was to smal
For him, which was a lord real;
To yive a man so litel thing
It were unworschipe in a king. 2130
Be this ensample a king mai lere
That forto yive is in manere:
For if a king his tresor lasseth
Withoute honour and thonkles passeth,
Whan he himself wol so beguile,
I not who schal compleigne his while,
Ne who be rihte him schal relieve.
Bot natheles this I believe,
To helpe with his oghne lond
Behoveth every man his hond 2140
To sette upon necessite;
And ek his kinges realte
Mot every liege man conforte,
With good and bodi to supporte,
Whan thei se cause resonable:
For who that is noght entendable
To holde upriht his kinges name,
Him oghte forto be to blame.
Of Policie and overmore
To speke in this matiere more, 2150
So as the Philosophre tolde,
A king after the reule is holde
To modifie and to adresce
Hise yiftes upon such largesce
That he mesure noght excede:
For if a king falle into nede,
It causeth ofte sondri thinges
Whiche are ungoodly to the kinges.
What man wol noght himself mesure,
Men sen fulofte that mesure 2160
Him hath forsake: and so doth he
That useth Prodegalite,
Which is the moder of poverte,
Wherof the londes ben deserte;
And namely whan thilke vice
Aboute a king stant in office
And hath withholde of his partie
The covoitouse flaterie,
Which many a worthi king deceiveth,
Er he the fallas aperceiveth 2170
Of hem that serven to the glose.
For thei that cunnen plese and glose,
Ben, as men tellen, the norrices
Unto the fostringe of the vices,
Wherof fulofte natheles
A king is blamed gulteles.
A Philosophre, as thou schalt hiere,
Spak to a king of this matiere,
And seide him wel hou that flatours
Coupable were of thre errours. 2180
On was toward the goddes hihe,
That weren wrothe of that thei sihe
The meschief which befalle scholde
Of that the false flatour tolde.
Toward the king an other was,
Whan thei be sleihte and be fallas
Of feigned wordes make him wene
That blak is whyt and blew is grene
Touchende of his condicion:
For whanne he doth extorcion 2190
With manye an other vice mo,
Men schal noght finden on of tho
To groucche or speke therayein,
Bot holden up his oil and sein
That al is wel, what evere he doth;
And thus of fals thei maken soth,
So that here kinges yhe is blent
And wot not hou the world is went.
The thridde errour is harm comune,
With which the poeple mot commune 2200
Of wronges that thei bringen inne:
And thus thei worchen treble sinne,
That ben flatours aboute a king.
Ther myhte be no worse thing
Aboute a kinges regalie,
Thanne is the vice of flaterie.
And natheles it hath ben used,
That it was nevere yit refused
As forto speke in court real;
For there it is most special, 2210
And mai noght longe be forbore.
Bot whan this vice of hem is bore,
That scholden the vertus forthbringe,
And trouthe is torned to lesinge,
It is, as who seith, ayein kinde,
Wherof an old ensample I finde.
Among these othre tales wise
Of Philosophres, in this wise
I rede, how whilom tuo ther were,
And to the Scole forto lere 2220
Unto Athenes fro Cartage
Here frendes, whan thei were of Age,
Hem sende; and ther thei stoden longe,
Til thei such lore have underfonge,
That in here time thei surmonte
Alle othre men, that to acompte
Of hem was tho the grete fame.
The ferste of hem his rihte name
Was Diogenes thanne hote,
In whom was founde no riote: 2230
His felaw Arisippus hyhte,
Which mochel couthe and mochel myhte.
Bot ate laste, soth to sein,
Thei bothe tornen hom ayein
Unto Cartage and scole lete.
This Diogenes no beyete
Of worldes good or lasse or more
Ne soghte for his longe lore,
Bot tok him only forto duelle
At hom; and as the bokes telle, 2240
His hous was nyh to the rivere
Besyde a bregge, as thou schalt hiere.
Ther duelleth he to take his reste,
So as it thoghte him for the beste,
To studie in his Philosophie,
As he which wolde so defie
The worldes pompe on every syde.
Bot Arisippe his bok aside
Hath leid, and to the court he wente,
Wher many a wyle and many a wente 2250
With flaterie and wordes softe
He caste, and hath compassed ofte
Hou he his Prince myhte plese;
And in this wise he gat him ese
Of vein honour and worldes good.
The londes reule upon him stod,
The king of him was wonder glad,
And all was do, what thing he bad,
Bothe in the court and ek withoute.
With flaterie he broghte aboute 2260
His pourpos of the worldes werk,
Which was ayein the stat of clerk,
So that Philosophie he lefte
And to richesse himself uplefte:
Lo, thus hadde Arisippe his wille.
Bot Diogenes duelte stille
A home and loked on his bok:
He soghte noght the worldes crok
For vein honour ne for richesse,
Bot all his hertes besinesse 2270
He sette to be vertuous;
And thus withinne his oghne hous
He liveth to the sufficance
Of his havinge. And fell per chance,
This Diogene upon a day,
And that was in the Monthe of May,
Whan that these herbes ben holsome,
He walketh forto gadre some
In his gardin, of whiche his joutes
He thoghte have, and thus aboutes 2280
Whanne he hath gadred what him liketh,
He satte him thanne doun and pyketh,
And wyssh his herbes in the flod
Upon the which his gardin stod,
Nyh to the bregge, as I tolde er.
This book is provided by FunNovel Novel Book | Fan Fiction Novel [Beautiful Free Novel Book]